ខេត្តបន្ទាយមានជ័យ៖ មន្ត្រីនគរបាលនៃវរៈសេនាតូចការពារព្រំដែនគោក ស្ថិតក្នុងខេត្តបន្ទាយមានជ័យ មួយចំនួន ត្រូវបានកម្លាំងសមត្ថកិច្ចចាប់ខ្លួន និងបញ្ជូនទៅកាន់សាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់ ពាក់ព័ន្ធនឹងការប្រព្រឹត្តបទល្មើសនាំទំនិញឆ្លងដែនដោ ខុសច្បាប់។

ជនសង្ស័យទាំងនោះត្រូវបានសមត្ថកិច្ចធ្វើការឃាត់ខ្លួន និងថតរូបបង្ហាញអត្តសញ្ញាណយ៉ាងច្បាស់លាស់ ដោយគ្មានការលាក់បាំងឡើយ ដើម្បីធានានូវតម្លាភាពក្នុងការអនុវត្តច្បាប់។

មហាជន បានលើកឡើងប្រៀបធៀបទៅនឹងករណីបទល្មើសផ្សេងទៀត ដូចជាករណីមន្ត្រីប្រព្រឹត្តបទល្មើសនៅក្នុងខេត្តកំពត ដែលកន្លងមកមិនត្រូវបានបង្ហាញអត្តសញ្ញាណជាសាធារណៈ ដោយមានការសង្ស័យថាអាចប៉ះពាល់ដល់បុគ្គលមានអំណាច ឬថ្នាក់ដឹកនាំ។ ការណ៍នេះបានបង្កើតឱ្យមានការជជែកដេញដោលអំពីស្តង់ដារនៃការអនុវត្តនីតិវិធីច្បាប់។

តាមគោលការណ៍ច្បាប់ និងក្រមសីលធម៌សារព័ត៌មាន ការបង្ហាញអត្តសញ្ញាណជនល្មើសចំពោះមុខច្បាប់ គឺជារឿងចាំបាច់សម្រាប់បទល្មើសនានាដែលប៉ះពាល់ដល់សន្តិសុខសង្គម និងសណ្តាប់ធ្នាប់សាធារណៈ លើកលែងតែករណីពិសេសមួយចំនួនដែលពាក់ព័ន្ធនឹងសន្តិសុខជាតិ ឬស្ថិតក្នុងដំណាក់កាលស៊ើបអង្កេតសម្ងាត់តែប៉ុណ្ណោះ។

មហាជននៅតែបន្តតាមដានយ៉ាងយកចិត្តទុកដាក់ចំពោះចំណាត់ការផ្លូវច្បាប់ទៅលើគ្រប់បុគ្គលប្រព្រឹត្តខុស ដោយគ្មានការរើសអើង។