ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រី លោក ហ្សង់ ហ្វ្រង់ស័រ តាន់ បានថ្លែងថា ការទូតពង្រឹងមិត្តភាពចាស់ និងពង្រីកមិត្តភាពថ្មី ក្នុងការទំនាក់ទំនងជាមួយសហគមន៍អន្តរជាតិ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាកំពុងអនុវត្តយ៉ាងខ្ជាប់ខ្ជួនជាទីបំផុត។ ការលកឡើងដូចនេះ ក្នុងវេទិកាសារព័ត៌មានលើកទី៩ សមិទ្ធផល ៣ឆ្នាំ នៃរាជរដ្ឋាភិបាលនីតិកាលទី៧។

លោក ហ្សង់ ហ្វ្រង់ស័រ តាន់ បានបញ្ជាក់ថា សម្រាប់គោលនយោបាយការទូតពង្រឹងមិត្តភាពចាស់ និងពង្រីកមិត្តភាពថ្មី ដែលបានដាក់ចេញតាំងពីជំនាន់អតីតព្រះមហាក្សត្រ និងសម្តេចអគ្គមហាសេនាបតីតេជោ ហ៊ុន សែន នោះ ត្រូវបានប្រមុខរាជរដ្ឋាភិបាលក្រោមការដឹកនាំរបស់សម្តេចធិបតី កំពុងបន្តអនុវត្តយ៉ាងខ្ជាប់ខ្ជួន។ លោកបានលើកឡើងយ៉ាងដូច្នេះថា៖ “សម្តេចធិបតីហ៊ុន ម៉ាណែត ដាក់ចេញជាគោលការណ៍ថា ត្រូវពង្រឹងមិត្តភាពចាស់ និងពង្រីកមិត្តភាពថ្មី។ ការទូតពង្រឹងមិត្តភាពចាស់ និងពង្រីកមិត្តភាពថ្មីនេះ គឺជានិរន្តរភាព និងជាសង្គតិភាពនៃនយោបាយការបរទេសកម្ពុជា ជាយូរអង្វែងណាស់មកហើយ។ និយាយបែបផ្សេងវាជាគោលការណ៍នៃនយោបាយការបរទេសរបស់កម្ពុជាដែលផ្តួចផ្តើមជាយូរអង្វែងណាស់មកហើយ ដោយព្រះបរមរតនកោដ្ឋ សីហនុ និងក្រោយមកសម្តេចតេជោ និងក្រោយថ្ងៃទី២៣ សីហា ឆ្នាំ២០២៣ បានកែលំអរ និងបានអនុវត្តយ៉ាងខ្ជាប់ខ្ជួន”។

លោក ហ្សង់ ហ្វ្រង់ស័រ តាន់ បានបន្តថា ការទូតពង្រឹងមិត្តភាពចាស់ និងពង្រីកមិត្តភាពថ្មី ក្នុងគោលដៅទំនាក់ទំនងជាមួយភាគីអន្តរជាតិនេះ គឺជាអ្វីដែលសម្តេចធិបតី ហ៊ុន ម៉ាណែត ត្រូវបានកំពុងបន្តអនុវត្តយ៉ាងម៉ឹងម៉ាត់ជាទីបំផុតអស់រយៈពេលប្រមាណជា៣ឆ្នាំមកហើយ តាំងពីសម្តេចបានឡើងកាន់តំណែងជានាយករដ្ឋមន្រ្តីកម្ពុជា។

បើតាមលោក ហ្សង់ ហ្វ្រង់ស័រ តាន់ គោលដៅចុងក្រោយបង្អស់នៃនយោបាយការបរទេស ដើម្បីពង្រឹងឯករាជ្យភាព និងតុល្យភាពនៃគោលនយោបាយការបរទេសរបស់កម្ពុជា។ ក្នុងនោះ ក៏បានពង្រឹងតួនាទីរបស់កម្ពុជាលើឆាកអន្តរជាតិផងដែរ។ ទាំងនេះ ពិតជាមានភាពចាំបាច់បំផុតក្នុងពេលស្ថានភាពពិភពលោកកំពុងមានការប្រែប្រួល មិនជាក់លាក់ និងផុយស្រួយ៕